Lai kolah sanak takana jo lagu ‘Palai Bada’ nan didedangkan dek Almarhumah Cik Uniang Elly Kasim di era tahun 70-an ? Bagi dunsanak nan alah agak ba uban salayang atau sapanuahnyo kapalonyo alah bauban, tantu lai takana jo lagu ciptaan M.Gaus ko.
Lagu palai bada ko sajo iyo sabana lamak untuak didanga, apolai palai bada nan marupoan makanan khas urang awak ko, tantu lamak pulo untuak dimakan.
Tapi sayang sangenek palai bada ko alah agak jarang disuo, alah payah mancari dima tampek urang manjuanyo.
Sabananyo mambuek palai bada ko indak lo payah-payah amek doh. Nan paliang pantiang bana sadioan bahan-bahannyo labiah dulu. Bahanyo barupo 1/2 kg bada, 1/2 buah karambia nan alah bakukua, 15 incek bawang merah, 7 incek bawang putih, 5 incek supadeh, 1 rueh kunyik, 1 ons lado kutu, 5 sendok lado merah nan alah bagiliang aluih, asam kapeh agak saincek.
Sudah tu, sadioan pulo 5 halai daun kunyik, daun ruku-ruku agak sabinjek, daun pisang sasuai jo kaparaluan, garam sasuai jo kaparaluan sarato lidi.
Saumpamo barang kaparaluan untuak mambuek palai bada tu alah ado, jan dilatak-an sajo di ateh meja, sabab sampai mati inyo indak ka manjadi palai bada bagai tu doh ! Baa caronyo supayo kito bisa cepak cepong malapehan salero makan jo palai bada ko ?
Bantuak ko caronyo a, bahan palai bada nan alah dicampua aduak tu dikukuih sampai masak. Sudah tu bahan nan alah diaduak tadi serakan di ateh daun pisang sakitar tigo lapih kiro-kiro limo sendok. Saumpamo alah salasai, guluang daun pisang tu sampai bahan tadi tatutik habih, sudah tu sapik jo lidi.
Kini tingga mamanggang barang nan alah salasai tadi di tungku sakitar 20 minik manggunoan sabuik karambia. Kalau alah daun pisang tu mulai maitam sarato tabaun harum, itu tandonyo palai bada tu alah masak mah. Sudah tu makan lah lai !
